Turan İbrahimov söylədiklərini danır

Aparıcı xalqdan üzr istəmək əvəzinə, bizi sifarişlə yazmaqda ittiham edir

Qəzetimizin ötən sayında «Lider» telekanalında yayımlanan «Əyri-düz» verilişinin aparıcısı Turan İbrahimovun bölgələr arasında ayrı-seçkilik saldığı barədə məlumat vermişdik. Qeyd etmişdik ki, aparıcı müğənni Natəvan Həbibiyə «Get Gədəbəydən, ya da Qazaxın kəndindən oğlan tapıb gətir əhliləşdir, sonra da onunla ailə qur» deməklə bu bölgədən olan insanları təhqir edib.

Onu da vurğulamışdıq ki, izahlı lüğətdə «əhliləşdirmək» sözü heyvanlara şamil edilir və bu, təhqirdir. Həmçinin veriliş efirə iki dəfə verilməsinə baxmayaraq, bu fikir montaj olunmayıb.
Dünən teleaparıcı «Lent.az»a açıqlamasında yazıya münasibət bildirib: “Əvvəla, mən Qərbi Azərbaycan bölgəsindənəm, atam da əslən Qazaxdandır. Əgər mən onları təhqir edirəmsə, ilk əvvəl atamı təhqir etmiş oluram. Yazılan fikirlər ya kiminsə təxəyyülünün məhsulu, ya da sifarişli yazıdır. Veriliş efirə birinci dəfə getmirdi. Düz bir ay bundan əvvəl efirə gedən verilişin təkrarı idi. Niyə məhz bu gün yazı yazmaq fikrinə düşdülər?”
Turan İbrahimov məqalənin sifarişli olduğunu başqa bir faktın da sübut etdiyini bildirir. Onun fikrincə, “fikrin montaj edilməməsi, olduğu kimi efirə verilməsi isə kanal rəhbərliyinin əyalət adamlarına yuxarıdan aşağı baxmasının göstəricisi kimi də qəbul oluna bilər” ifadəsi yazının sifarişli olduğunu sübut edir.
Əvvəla, aparıcının diqqətinə çatdıraq ki, verilişin nə vaxt hazırlanması və efirə verilməsi önəmli deyil. Biz «Əyri-düz»ün təkrarını ötən həftə izləmişik və deyilən fikirlərin təhqir olduğunu oxucularımızın diqqətinə çatdırmışıq. Bu, heç də bizim təxəyyülümüzün məhsulu deyil, efirdə olduğunu unudaraq, danışığına fikir verməyən T.İbrahimovun işlətdiyi ifadədir. Digər tərəfdən, əgər yazıda fikir «fikrin olduğu kimi efirə verilməsi kanal rəhbərliyinin əyalət adamlarına yuxarıdan aşağı baxmasının göstəricisidir» kimi getsəydi, o zaman hörmətli aparıcı bizi sifarişli yazı yazmaqda ittiham edə bilərdi. Yaxşı olardı ki, T.İbrahimov irad bildirmək əvəzinə, öz çıxışlarına diqqət yetirsin və milyonlarla insanın ona tamaşa etdiyini unutmasın.
Yeri gəlmişkən, onu da qeyd edək ki, yazının yalnız bizim qəzetdə işıqlandırılmasına baxmayaraq, «Lent.az» portalı «Bizim Yol»a istinad etməyib. Halbuki bu portalın mənsub olduğu agentliyin rəhbərliyi daim qəzetlərlə istinad davası aparır. Bu, həm də bir peşə etikasıdır və biz də qarşı tərəfdən bunu umuruq.